مريم الخشت تعلق على انتقادها بسبب بشرتها في مسلسل طالع نازل

ردت الفنانة مريم الخشت على الانتقادات التي وجهها البعض لها بسبب وجود مشاكل في بشرتها وقت تصوير مسلسل طالع نازل، بعد استخدام بعض أطباء التجميل صورا لها في الدعاية لأعمالهم، وذلك خلال مداخلة هاتفية ببرنامج “اليوم هنا القاهرة”.

مريم الخشت

قالت مريم: “أنا أصلًا مكنتش أعرف، أنا ماببصش خالص، علاقتي بالسوشيال ميديا ضيقة جدا، يعني مابشوفش حاجات بسهولة، فلقيت إن فيه ناس بتبعت لي سكرين شوت من جروبات على فيسبوك، أو حتى مش عارفة المنصة، وكانوا بيبعتوا لي حاجات ويقولوا لي بصي الناس بتدافع عنك، وأنا أصلا مش عارفة هما بيدافعوا عن إيه، ومش فاهمة إن فيه مشكلة، ماعرفش حاجة خالص”.

وتابعت: “لحد ما جت لي حاجات وابتديت أقراها، فهمت بقى اللي حصل وما تضايقتش بصراحة شديدة، أولًا ما تضايقتش لأني مش مؤمنة بالكلام، ومش شايفة إن الكلام ده حقيقي ولا صح، ولا هي حاجة هزتني أنا شخصيا لدرجة إن لما أسمع حد بيتكلم عليها تهزني أكتر، والموضوع ما كانش في بالي خالص”.

استخدام أطباء التجميل لصور مريم الخشت

وعن استخدام بعض أطباء التجميل صورها في الدعاية، قالت: “كون إن في دكاترة أو كده أخدوا صورة علشان يعملوا دعاية عليها، أنا حاسة إن ده شيء متوقع وطبيعي، مسلسل ناجح جدا جدا الحمد لله، ومن الطبيعي إن كل الناس بمختلف مجالاتهم يشوفوا طريقة تخلي المجال اللي هم فيه يلمس المسلسل ده بنجاحه بشكل ما، علشان يستفيدوا من الكلام والتريند على هذا المسلسل”.

وعن اتخاذها أي إجراء قانوني قالت: “لأ خالص، إجراء قانوني ليه؟ هو في الآخر الناس دي بيعملوا كده علشان عايزين يستفيدوا من شيء معين، والكلام ما يضايقنيش أنا شخصيا كان فيه كمية ناس بترد أصلا كأني أختهم، الموضوع ده لمسني بشكل فظيع، يعني أنا لو حصل أي حاجة، أنا اتبسطت جدًا من كمية الناس اللي شافت إن الموضوع ده كأنه يخصهم هما، وبيدافعوا عني كأني فعلًا من عيلتهم. دي حاجة كانت حلوة جدًا”.

وعن معايير الجمال بالنسبة لها

وقالت: “الناس أخدت أوي على إنهم بيشوفوا الشخص اللي بيطلع في التليفزيون بشكل مثالي جدًا، مع إن دي مش الحقيقة، الأشخاص اللي شكلها مثالي جدًا، واللي معمول لها ديجيتال ميك أب، مثلًا لو فيه حد عامل أي إجراءات أو كده، دي اختيارات شخصية ومن حقهم، وده طبيعي، لكن أنا مش الشخص ده وما بحبش الحاجات دي”.

وتابعت: “أنا واحدة بتصور مسلسل صعب جدًا ومجهد جدًا، والميك أب اللي طول اليوم ده أصلًا يؤذي البشرة بشكل فظيع، فلما الواحد بينام قليل، وبيشتغل كتير، وتحت ضغط، وحاطة ميك أب طول اليوم، لو بشرتي ما حصلش فيها مشاكل، يبقى أنا مش بني آدمة حقيقية، يبقى في حاجة غلط، أكيد أنا مش باربي، ووالله أنا ما عنديش مشكلة، اللي عايز يعمل ده، ده اختيار شخصي، وشيء طبيعي، ما فيهاش أي حاجة، بس هو الموضوع كمان إنهم ابتدوا يتكلموا إنه أصلا مش مقبول إن الممثلة جلدها يبقى فيه أي شوائب من أي نوع، ليه هي مش إنسانة؟”.

أحداث وأبطال مسلسل “طالع نازل”

تدور أحداث مسلسل “طالع نازل” حول موسيقار يعيش حياة زوجية تبدو مستقرة مع زوجته، سيدة الأعمال القوية ومالكة إحدى الشركات الكبرى.

وتجد الزوجة نفسها أمام صدمة قاسية، تدفعها إلى خوض صراع نفسي بين الألم ومحاولة استعادة كرامتها، بينما تتصاعد الأحداث نحو مواجهة حاسمة تقودها إلى الانتقام.

ويشارك في بطولة المسلسل كل من منى زكي، ومحمد شاهين، ومريم الخشت، وليلى عز العرب، وميمي جمال، وحمزة دياب، تأليف سماء أحمد عبدالخالق وإنجي القاسم، وإخراج هاني خليفة.

اقرأ أيضًا:

25 صورة | 5 نجوم تزوجوا في سن كبيرة.. أحدهم بعمر 81 عامًا

عمرو دياب ينشر صورا من حفله الغنائي في دبي بحضور منى وحلمي وزيدان

بالفيديو.. طرح البرومو الأول لحدوتة “حب مسموم” من أعمال “القصة الكاملة”